भद्रपुर नगरपालिकाको तेस्रो नगरसभाबाट नगर–विकासका २९ वटा निर्णय पारित

भद्रपुर । झापाको सबैभन्दा जेठो नगरपालिका भद्रपुर नगरपालिकाले तेस्रो नगरसभा सम्पन्न गरेको छ । जनप्रतिनिधिले जिम्मेवारी सम्हालेपछि झापाका १५ वटै स्थानीय तहमध्ये सबैभन्दा पहिले नगरसभा सम्पन्न गर्ने कार्यलाई भद्रपुर नगरपालिकाले निरन्तरता दिएको हो । भद्रपुरले पहिलो र दोस्रो नगरसभा पनि अरु स्थानीय तहभन्दा अगाडि नै सम्पन्न गरेको थियो ।

यो नगरसभालाई चालु आर्थिक वर्षको पहिलो छ महिनाको प्रगतिको समीक्षा, त्यसमा देखिएका कमी–कमजोरीको सुधार र थप नयाँ योजना, निर्णय र कार्यान्वयनको समीक्षाको कडीको रुपमा रहेको बताइएको छ । नगरप्रमुख जीवनकुमार श्रेष्ठको अध्यक्षतामा नगरपालिकाकै सभाहलमा सम्पन्न सो नगरसभाले भद्रपुर नगरपालिकाको काम–कारवाही स्थानीयस्तरसम्म सहज तथा सुलभ रुपमा परिचालन गर्ने उद्देश्यले तयार भएका कार्यविधि तथा मापदण्डसहतिका संशोधनसहितको २९ वटा निर्णय पारित गरेको छ ।

नगरसभाले हिंसापीडित तथा मानव बेचविखनपीडित महिला र बेवारिबे बालबालिकाकालागि अल्पकालिन सेवा केन्द्र तथा कोष सञ्चालन कार्याविधि २०७५, टोल विकास संस्था संचालन कार्याविधि २०७५, .अपाङ्गता भएका व्यक्तिहरुको परिचयपत्र वितरण कार्यविधि २०७५ पारित गरेको छ । त्यस्तै मदिरा व्यवसाय संचालन तथा बिक्री वितरण मापदण्ड २०७५ र जग्गा खण्डिकरण गर्ने सम्बन्धी मापदण्ड २०७५ पारित गरेको छ ।

नगरसभाले कृषि समूह गठन, कृषि सहकारी संस्था, सहकारी पसल सञ्चालनसम्बन्धी दर्ता, शुल्क र नविकरणसम्बन्धी, सुरक्षित आप्रवासन पयिोजना (सामी), नगरपालिका तथा वडा कार्यालय भवन, आधारभूत स्वास्थ्य केन्द्र तथा जेष्ठ नागरिक भवन निर्माणसम्बन्धी व्यवस्थाहरुलाई पारित गरेको छ ।

नगरसभाले नगरपालिकाको बृहत एककृत शहरी विकास योजना, नगरपालिको भू–उपयोग गुरु योजना, यातायात गुरु योजना, पर्यटन गुरुयोजनालाई पनि पारित गरी यथाशीघ्र कार्यान्वयनको चरणमा लैजाने निर्णय गरेको छ भने विर्तामोडबाट झापाको सदरमुकाम जोड्ने सडक मर्मत सुधार र चार लेनको सडक विर्तामोडबाट चार किलोमिटर मात्र भएकोले सो सडकलाई चारलेनकै मापदण्डबमोजिम भद्रपुरसम्म पुर्याउने गरी नेपाल सरकार, भौतिक योजना, पूर्वाधार तथा यातायात मन्त्रालय अन्तर्गतको सडक विभागमा अनुरोध गर्ने निर्णय गरेको नगरप्रमुख श्रेष्ठले जानकारी दिए । यसैगरी, भद्रपुर नगरपालिकाभित्र सञ्चालित सघन शहरी विकास कार्यक्रमअन्तर्गत निर्माणाधीन सडक तथा नाला समयमै सम्पन्न गराउने गरी पहल गर्ने र सो कार्यक्रमका लागि प्राप्त हुने भनिएको थप बजेट प्राप्तिका लागि पनि पहल गर्ने निर्णय गरिएको बताइएको छ ।

नगरसभाले बालमैत्री स्थानीय शासनयुक्त नगरपालिका बनाउन अवलम्बन गर्नुपर्ने चरणहरु यथाशीघ्र पूरा गरी भद्रपुरलाई बालमैत्री नगरपालिका घोषणा गर्ने निर्णय पनि गरेको छ । यसैगरी, विगतदेखि हालसम्म फर्छ्यौट हुन नसकेको १ करोड ५१ लाख ५६ लाख ४४९ रुपैयाँ पेश्की रकम फर्छयौटका लागि सम्बन्धित व्यक्ति तथा संस्था–निकायहरुलाई ताकेता गर्नुपर्ने देखिएको लेखा समिति संयोजक तथा ६ नं वडा सदस्य अजय साहेवालालले बताए ।

सामाजिक शाखा प्रमुख राजन न्यौपानेले सञ्चालन गरेको नगरसभामा नगरसभाको विषयगत समितिका संयोजकहरुले आ–आफ्नो विषयको प्रगति प्रस्तुत गरेका थिए भने प्रमुख प्रशासकीय अधिकृत तुलसीबहादुर श्रेष्ठले स्वागतसहित औचित्यमाथि प्रकाश पारेका थिए ।

नगरपालिकाले तयार पारेको बृहद÷एकीकृत शहरी विकास योजनाको पुस्तकसमेत लोकार्पण गरिएको नगरसभामा उपप्रमुख चन्द्रा श्रेष्ठले सबै जनप्रतिनिधिको एकताबद्ध प्रयासबाट नगरसभाले अनुमोदन गरेका निर्णयहरु कार्यान्वयन गर्न सकिने उल्लेख गरिन् भने वडाध्यक्ष गौरव सुब्बाले जनप्रतिनिधि आएपछि नगरवासीले समाजमा परिवर्तन आएको महसूस गर्नसक्ने गरी जनप्रतिनिधिले काम गर्नुपर्ने बताए

प्रतिक्रिया व्यक्त गर्नुस्
TAGS

COMMENTS

Wordpress (0)
Disqus (1 )