मतदान गरी सकेपछि ओली के भने ?

भक्तपुर ।  एमालेका अध्यक्ष केपी शर्मा ओलीले अब देश राजनीतिक स्थिरताको बाटामा अघि बढेको बताएका छन् ।

पूर्वप्रधानमन्त्री ओलीले भक्तपुर क्षेत्र नम्बर २ अन्तर्गत महेन्द्र शान्ति मावि मतदान केन्द्रबाट मतदानपछि सञ्चारकर्मीलाई प्रतिक्रिया दिँदै एमाले एक्लैको बहुमत आउने र बाम गठबन्धनको दुई तिहाई आउने जिकिर गरे ।

झापा क्षेत्र नम्बर ५ बाट प्रतिनिधिसभा सदस्यमा उम्मेदवारी दिएका उनले मतदाता नामावली भने भक्तपुरमा छ ।

नेता ओलीले भने, ‘देश अब विकास र समृद्धिमा अगाडि बढ्छ, निर्वाचन हुन्छ कि हुँदैन भन्ने अन्योललाई चिर्दै आज निर्वाचन सफलतापूर्वक सम्पन्न भएको छ, यो ठूलो उपलब्धि हो ।’

उनले चुनाव सार्ने प्रधानमन्त्री शेरबहादुर देउवाले अनेकौँ प्रयास गरेको र त्यो प्रयास असफल भएको टिप्पणी गर्दै भने, ‘प्रधानमन्त्रीले चुनाव सार्न अनेकाँै प्रयास गर्नुभयो, आफ्ना सहयात्रीलाई अदालत धाउन लगाउनेदेखि मतपत्र छाप्न नभ्याउनेसम्मका अनेक समस्या खडा गर्नुभयो तर हामीले चुनावबाहेक अरु कुरामा ध्यान दिएनौँ, अन्ततः चुनाव सम्पन्न भयो ।’

चुनावको बेला सयौँ ठाउँमा बम पड्काएर व्यक्तिको हत्या गर्नेदेखि उम्मेदवार घाइते बनाउनेसम्मका काम हुँदा पनि सरकारले बम कसले पड्काएको हो भन्न नसकेको भनी आलोचना गरे । उनले देशले छिट्टै नयाँ सरकार पाउने बताउँदै वाम गठबन्धनको एकतालाई पनि पूर्ण रुप दिइने बताए ।

प्रतिक्रिया व्यक्त गर्नुस्
TAGS

COMMENTS

Wordpress (0)
Disqus (0 )