बिर्तामोड। झापा जिल्ला डोरीतान संघ र हल्दीवारी जेसीजको संयुक्त आयोजनामा हल्दिवारीमा झापा जिल्ला स्तरीय दोस्रो डोरी तान आउटडोर च्याम्पियनसिप २०८२ को तयारी गरिएको छ।
आगामी मंसिर ११ गते बिहीबार हल्दीवारी गाउँपालिका वडा नं.५ कञ्चनश्रीस्थित मोती आधारभूत विद्यालयको खेल मैदानमा झापा जिल्ला स्तरीय दोस्रो डोरी तान आउटडोर च्याम्पियनसिप २०८२ सञ्चालन गरिने झापा जिल्ला डोरीतान संघ र हल्दीवारी जेसीजकी अध्यक्ष युनिता दवाडीले बताइन्।
डोरी तान खेलको माध्यमबाट युवाहरूलाई खेलकुद मार्फत सक्रिय बनाउन तथा डोरीतान खेलको प्रबर्द्धन गर्न झापा जिल्ला स्तरीय दोस्रो डोरी तान आउटडोर च्याम्पियनसिप २०८२ आयोजना गरिएको उनले बताइन्।
डोरीतान खेललाई नेपालमा लोकप्रिय बनाउँदै यसबाट पर्यटन विकास गर्ने र खेलाडीहरूको भविष्य सुनिश्चित गर्ने उद्देश्य रहेको उनको भनाई छ।
झापा जिल्ला स्तरीय दोस्रो डोरी तान आउटडोर च्याम्पियनसिप २०८२ मा प्रथम हुने टिमले नगद ५१ हजार रुपैयाँ सहित ट्रफी, मेडल र प्रमाणपत्र प्राप्त गर्ने र उपविजेता टिमले ३१ हजार रुपैयाँसहित ट्रफी, मेडल तथा प्रमाणपत्र प्राप्त गर्ने उनले बताइन् ।
कार्यक्रम सफल बनाउन करिब ९ लाख ८२ हजार रुपैयाँ लाग्ने र बिभिन्न पालिका र दाताको सहयोग लिने उनले बताइन् ।
झापा जिल्ला स्तरीय दोस्रो डोरी तान आउटडोर च्याम्पियनसिप २०८२मा तीन विभागीय टोली, १५ वटा पालिकाका टिम गरि जम्मा १८ वटा टिमले सहभागिता जनाउने हल्दीबारी जेसीजकी समेत अध्यक्ष रहेकी युनिता दवाडीले जानकारी दिइन्।
झापा जिल्ला स्तरीय दोस्रो डोरी तान आउटडोर च्याम्पियनसिप २०८२मा सहभागी खेलाडीहरू घाइते भए नेको इन्स्योरेन्ससंगको सहकार्यमा एक दिनको उपचार बिमा गरेको र कार्यक्रममा सहभागी प्रमुख अतिथी,अतिथिहरूलाई कामाक्षा चिया प्रशोधन प्रालिद्वारा उत्पादित चिया मायाको चिनो स्वरूप प्रदान गरिने उनले बताइन्।
झापा जिल्ला स्तरीय दोस्रो डोरी तान आउटडोर च्याम्पियनसिप २०८२ को संरक्षकमा राष्ट्रिय खेलकुद परिषद, कोशी प्रदेश डोरीतान संघ, झापा जिल्ला खेलकुद विकास समिति, हल्दीबारी गाउँपालिका रहेको उनको भनाई छ।
कार्यक्रममा सहभागी कोशी प्रदेश डोरीतान संघकी उपाध्यक्ष हिमा मिश्र पौड्याल, झापा जिल्ला डोरीतान संघका उपाध्यक्ष कुशबराज मैनाली, हेम न्यौपाने, सचिव मनिष मुर्मू, कोषाध्यक्ष मेनुका उप्रेती, सदस्य श्री न्यौपाने, हल्दीवारी जेसीजका जनसम्पर्क अधिकारी मिलन विश्वकर्मा, शाखा सम्पादक भीम अधिकारीलगायतले प्रतियोगिता सफल बनाउन लागीपर्ने बताए।
झापा जिल्ला डोरीतान संघ र हल्दीवारी जेसीजकी अध्यक्ष युनिता दवाडीको अध्यक्षतामा सम्पन्न कार्यक्रमको सञ्चालन हल्दीवारी जेसीजका महासचिव प्रायुस पौड्यालले गरेका थिए।
